Kantarellfest

DSC_0065 1

Eg et kantarellar så ofte som eg kan i desse tider. Den kjøttaktige smaken og nydeleg konsistensen gjer at eg gjerne vil bruke den i alt!

Er det noko kantarellane må nyttast til kvart år, så er det ein real risotto. Trekt i kvitvin, kraft og toppa med frisk timian og god olivenolje, -det er smaken av tidleg haust!

Risotto er overraskande lettvint å lage så kvifor lagar me ikkje dette oftare?! Heldigvis er det ofte rikeleg til overs slik at det er nok til lunsj dagen etter. Risottoen blir berre enda betre etter eit døgn då smakane verkeleg får konsentrert seg.

Utgangspunktet for denne oppskrifta fann eg i Jamies Italia, -ei utruleg fin bok om ein er glad i italiensk mat. -Og DET er me jo!

DSC_0055 1

Ingredienser (6 porsjonar)

  • 1 l kraft av kjøt, fisk eller grønsaker (her kan ein nytte buljong om ein ikkje har)
  • 1 lauk
  • 2 kvitlaukbåtar
  • 1/2 sellerirot
  • 400 g risottoris
  • 2 gl tørr kvitvin
  • 75 g smør
  • 125 g parmesan
  • 2 ss olivenolje
  • 1 ss smør
  • salt og pepar
  • 200 g kantarellar
  • 1 heil kvitlauk
  • 1 sitron
  • 1 liten bunt frisk timian
  • 1 ss smør
  • parmesan
  • salt og pepar
  • olivenolje

Skrell og finhakk lauk, kvitlauk og sellerirot. Sett steikeomnen på 200 grader.

Varm krafta i ein kjele. Varm olivenolje og smør i ein annan og surr lauk, kvitlauk og selleri i ca. 15 minutt til det er blankt. No er grønsakene møre og ein har i risottorisen.

Steik risen forsiktig medan du rører. Etter eit minutt byrjar riskorna å bli gjennomsiktige. Då heller ein i kvitvinen og fortset å røre.

Når vinen har kokt inn i risen, heller du i ei ause med kraft og ei god klype salt. Skru ned varmen slik at det småputrar. Riskorna skal ikkje bli kokte for raskt. Fortset å ause ei og ei ause over risottogryna, men la kvar ause med kraft bli absorbert i risen før du heller i neste (dette høyres omstendeleg ut, men er mindre tidkrevjande enn ein trur. Her snakkar me omtrent eit kvarter!).

Medan du gjer dette har du litt olje i ei eldfast steikepanne og ha i kantarellane. Pass på at steikepanne ikkje har delar av plast. Dersom så bør ein helle kantarellane over i ei anna form før det skal inn i omnen. Steik  kantarellane i steikepanna i 2 minutt. Dryss over salt og pepar, kvitlauksbåtar (delt i to), finhakka timian og smør før du set det inn i omnen og lar surre vidare i 5-6 minutt.

Smak på risottorisen for å sjekke at den er kokt. Dersom den har fin konsistens treng du ikkje meir kraft. Om du slepp opp for kraft, tilset du berre litt kokt vatn. Smak til med salt og pepar.

Grovhakk halvparten av soppblandinga.Ta gryta av varmen og ha i smør, parmesan, den grovhakka soppen og litt ferskpressa sitronsaft. Rør godt og legg på loket slik at risottoen får kvile i eit par minutt.

Server risottoen toppa med resten av soppblandinga, frisk timian og god olivenolje.

DSC_0067 1

I kveld åt eg ein annan middagsversjon med kantarell. Det vart eit tilbakeblikk til fredagskveldane på det glade 90-tal. 😀 Oppskrift kjem!

/Inga

Paner bort kvardagsbluesen

DSC_0438 kopi

Etter ei heidundrande fin bryllaupshelg som eg kjem til å hugse lenge, var det litt av ein blåmåndag å vakne opp i det ein kan kalle ein «kvardagsleilighet». Kor er trerettersen, dei vidunderleg fine folka, musikken, dei vakre omgjevnadane og sjokoladefontena? Det einaste som kunne minne om fest, var hybelkaninene som dansa boogie under senga. Det er jommen meg godt me får besøk i dag. Det er beste oppskrifta på kaste-seg-rundt-shinings her i heimen.

Enn så lenge finst det andre triks i ermet for å kurere kvardagsbluesen. Som til dømes å pimpe opp fiskemiddagen med litt panering. Panering gir ein fantastisk crunch (fann ikkje eit godt nok skildrande norsk ord der)  og set nye, spanande smakar på billege fiskevariantar  som sei, lyr osv.

Ein må ikkje panere med den gode gamaldagse brødsmuleblandinga. Kvifor ikkje prøve frø, nøtter eller krydder? Eg lovar, -det vert høgtidsstemning i heimen av slikt.

Her kjem ei lita oppskrift på panering av fisk, squash (paneringa tok litt av) og til sist, det beste tilbehøret til fisk og kjøt no på seinsomaren.

DSC_0387 kopi

Panering av kvit fisk

  • ca. 200 g. fisk per pers.
  • 1 egg
  • salt og pepar
  • 6 ss kveitemjøl
  • 2 ss smør
  • 1 ss olje

Døme på paneringsblanding:

  • 1 ts korianderfrø
  • 1 ts spisskummen
  • 1 ts fennikelfrø
  • 1 ts heil, kvit pepar
  • 1/4 ts reven muskatnøtt
  • 1 ts salt

Ha fisken i ei bolle med kaldt vatn i 15-20 min. før du skal steike den. Dette for at den skal, -ja, bli fastare i fisken! Bruk gjerne isbetar i vatnet for å halde det kaldt. Dersom du brukar 2-3 ss salt per liter vatn gjer dette fisken saftigare.

Tørk fisken med eit reint kjøkenhandklede.

Bland paneringsblandinga i ein morter og mal det til ei fin blanding. Pisk egget for seg.

Dypp fisken i kveitemjølet, pensle over med egg før du dypper fisken i paneringsplandinga.

Varm smør og olje i ei steikepanne

Ha i fisken og la den steike 4-5 minutt på den eine sida, før du snur og steiker i 3-4 minutt på andre sida.

DSC_0402 kopi

Panering av squash

  • 1 squash
  • 1 del sesamfrø
  • 1 del linfrø
  • 1 del gresskarkjerner
  • 1 egg

Mel opp frøa i ein kjøkenmasking. Skyll squashen og del i lange, diagonale skiver. Pensle skivene med eit egg og dypp i frøblandinga. Steik i 3-4 minutt på den eine sida, og likeeins på andre sida.

DSC_0408 kopi

Det beste tilbehøret til fisk og kjøt i august er…

  • cherrytomater
  • salt og pepar
  • olivenolje

På denne tida finn ein dei beste, norske tomatene i butikken (eller om du er skikkeleg heldig; i drivhuset). Ein veldig fin måte å bruke dei på, er å ovnsbake dei slik som dei er. Tida i omnen får fram fantastiske smakar i tomatene. Dei kan til tider minne om søte jordbær!

Det beste er om ein har skikkeleg god tid. Om du har 3-4 timar, steik dei på 60-70 grader, Om du har 1-2 timar, steik dei på 150 grader. Om du har kortare tid enn dette, steik på 180-200 grader i rundt 20 minutt. Smaken vert definitivt best om ein har god tid, men tja, det er sjeldan ein har det i kvardagen.

Skyll tomatene og legg på eit steikebrett dekka med bakepapir. Drypp over godt med olivenolje og nykverna salt og pepar. Steik i omnen på ynskja grader over ynskja tid (sjå ovanfor).

Ha ein feiande fin måndag!

/Inga

Eit ertig mellommåltid

DSC_0140 4

Grøne erter er frykteleg godt, sunt og har ein fantastisk fin farge. Eg er blitt veldig glad i å bruke dei i supper og salatar. Her er ein ny versjon; som pesto! Servert på erteflatbrød som eg fekk med meg heim på torsdag, vart det eit skikkeleg «ertete» mellommåltid i går.

Oppskrifta er litt lita. Det rekk til to personar (eller ein om du smører like tjukt på som meg). Dersom eg skal lage dette til fleire personar vil eg difor doble oppskrifta.

Oppskrifta er heller ikkje ein klassisk pesto, då den ikkje inneheld parmesan. Det kan ein eventuelt tilsette om ein ynskjer ein rundare smak.

Nyt saman med grillmat eller fisk, på bruschetta, på toppen av pizzaen eller kort og godt på eit flatbrød slik som her.

DSC_0147 4

Ingredienser

  • 1 dl frosne erter
  • 2 ss valnøtter
  • 1/2-1 fedd kvitlauk
  • 2 ss olivenolje extra virgin
  • 1/2 ss sitronsaft/limesaft
  • Salt og pepar

Bland saman alle ingrediensene i ein blender. Køyr maskina til du har ynska konsistens. Ferdig!

/Inga

Tidsklemme-coleslaw

DSC_0024 6Det kjekkaste er å lage mat frå botn av. Men. Alle veit at det er greitt å ha nokre (mange) kjappisløysingar i ermet. I hvertfall når det kjem til å snike inn litt grønt i maten! Eg er stor tilhengar av å snike inn frukt og grønsaker der ein kan i kvardagen.

No er grillsesongen godt i gong og ein vil berre ut ut ut når ein kjem heim frå jobb. Grillmat er best med godt tilbehør. -Men korleis løyse dette om ein har dårleg tid til førebuing?

Det er mange gode løysingar i butikkane om dagen. Ferdigblanda salatar, småboksar med oliven m.m. Det er blitt enklare å leve sunt i hurtigkvardagen og fint er det!

Her er ein kjappisversjon av coleslaw som eg har lese om fleire stader på nettet, for så å bruke i stor stil sjølv. Enkelt, godt og genialt.

Det einaste ein treng er ein gaffel (eller skei) og noko å blande i. Resten kjøper ein med seg på butikken.

Bland ut ein ynskja dipmiks i ein boks kesam. Hell ein pose ferdig råkostsalat i ei bolle og vend inn dip’en. Simsalabim så har du ein digg coleslaw til grillmaten!


DSC_0027 7

/Inga

Sitruslengsel

DSC_0218Eg har nemnt tidlegare at eg har ein forkjærleik for sitrus. Her ein dag tok lengselen overhand og eg måtte til naboen for å låne egg, slik at eg kunne lage sitronsabayonne til laksen. Storhandelen var nett overstått men egga hadde gått i gløymeboka. Godt ein har kjekke naboar to meter frå utgongsdøra!

Sitronsabayonne er sitronsaus som passar like godt til fisk som til kjøt. Den er syrleg, frisk og ein real oppkvikkar no på våren.

Sitronsabayonne (4 porsjonar)*

  • 2 eggeplommer
  • 1ts Dijon-sennep
  • saft og skal frå ei sitron
  • 1 ss tørka persille**
  • 100 g smør
  • 2 ts sukker***
  • 0,5-1 dl olivenolje

Pisk opp eggeplommene, persille, sennep, sukker og sitronsaft over eit vannbad, til du har eggedosiskonsistens. Smelt smøret til det byrjar å bruse i panna. Ta panna vekk i frå plata og la det kjølne i 5 minutt. Vend smøret inn i eggedosisen saman med olivenolje. Smak til med salt og pepper.

Server med til dømes asparges og steikt lakseloin!

* Sabayonne er ein eggedosiliknande fransk saus, som hovudsakleg inneheld egg, sukker, kvitvin og som ein bruker til dessertar. Dette er ein middagsvariant, -framleis med eggedosiskonsistens men med litt utbyting av ingredienser.
** eg brukte persille denne gongen, men estragon er også godt.
*** agavesirup eller sukrin kan også fungere fint om ein ikkje vil nytte vanleg sukker. Litt sødme må likevel til då sitronsafta fører til særs mykje syre. 2 ts sukker kan somme gonger vere for lite, så her må ein smake seg fram.

DSC_0234 3

Eg har tidlegare lagt ut ei oppskrift på klementinsaus som eg nytta til and. Appelsinsaft kan ein også nytte i desse sausane, for ikkje å snakke om lime! Dette har eg ikkje prøvd før, men står høgt på lista. Dersom ein nyttar appelsin eller klementin, treng ein ikkje sukker i sausen, men det må til når ein nyttar sitron og lime.

/Inga