Basisoppskrift for smuldrepai

DSC_0745

Det er fortsatt somar sjølv om me har vendt nasa tilbake til kvardagen. Då må ein passe på å snike inn litt somarferie der ein kan, -som noko godt og søtt på ein heilt vanleg kvardag!

I dag skulle eg få nokre fine naboar på besøk og var i beit for kaffimat. Då laga eg den beste restematen eg veit, -nemleg smuldrepai. Smuldrepai fylgjer «man tager hva man haver-prinsippet», har få ingredienser og er uhyre enkelt å lage. På toppen av det heile smakar det så innmari godt!

Eg tømte fruktskåla for to aprikos, to eple og tre fersken. Toppa med smuldrelok, -rykande varmt, var det ein høydare!

DSC_0749

Smuldrepai (basisoppskrift)

  • frukt og/eller bær (nok til å fylle halvparten av den ildfaste forma du skal bruke)
  • 1 ss maizena
  • safta av 1/2 sitron
  • 1 ts vaniljesukker
  • 100 g kveitemjøl
  • 100 g havregryn
  • 50 g brunt sukker
  • 100 g kaldt smør i terningar

Sett omnen på 180 grader.

Skjær frukten i små terningar og legg i ei ildfastform. Skvis over sitronsaft og dryss over vaniljesukker. Bland frukten før du vender den til slutt i maizenamjøl.

Bland saman kveitemjøl, havregryn og brunt sukker. Smuldre inn smørterningane i mjølblandinga før du fordeler den over fruktblandinga.

Steik i omnen i omtrent 30 minutt.

DSC_0751

      Server med ein klatt rømme, kesam eller enda betre, -is!

DSC_0754

/Inga

Frå triste brødskalkar til lekker somartopping

Har du som meg ofte tørre brødskalkar liggande i brødskuffa?  Då er det gull verdt at ein kan bruke det tørre brødet på noko skikkeleg fint og velsmakande.  Sprø, krydra krutongar er utruleg godt som topping på suppa og i salaten. Dette er gjenbruk av restemat som set sølvkant på eit vanleg middagsmåltid.

DSC_0124

Brødkrutongar

  • tørt brød. Man tager hva man haver. Tøm brødskuffa for brød og rundstykke, -grovt som fint!
  • olivenolje
  • salt, pepar og eventuelle andre krydder (eg nyttar gjerne oregano som er ei nøytralt og fint krydder som passar til mykje).

Skjer opp brødet i terningar. Fordel terningane i ei langpanne og ha rikeleg med olivenolje over. Kvar terning bør ha litt olivenolje på seg for godt resultat, så vend gjerne blandinga litt med ei skei før du set det inn i omnen. Ein får best resultat om krutongane ikkje ligg i fleire lag. Har du mykje, er det betre å steike i fleire omgongar. Då sikrar du at krutongane får nok varme og blir sprø og fine.

Steik på 200 grader i 10-15 minutt. Vend brødblandinga med ei skei eller tresleiv kvart femte minutt for at terningane skal få jamn steiking.

La det kjølne før du heller på eit glas eller i boks for vidare oppbevaring.

DSC_0144 DSC_0157

/Inga

Torsk, jordskokk og spekepølse frå Etne

DSC_0110
Resultatet etter skattejakt i kjøleskap og frys. Persillebuketten låg nederst i skuffa men vart gløymt med ein gong den var tatt fram, og kom ikkje lenger enn til skjærefjøla.

Rett før me sette oss i bilen i Etne for å køyre heim etter ferien, grov mannen opp jordskokk i åkeren. Der har den vore og kost seg over vinteren. Jordskokk er noko av det beste eg veit. Skjær det i bitar og bak i omnen med andre rotgrønsaker eller bruk det i stappe saman med til dømes potet. Jordskokken set ein heilt fantastisk, nøtteaktig smak på maten! Har du ikkje smakt det før, bør du legge det i handlekorga neste gong du kjem over ein knoll på butikken.

Litt av rota skal plantast her i hagen i Haugesund (uuups! Stryk det. Moderen ringte og sa at det var lite lurt i eit tett bustadområde då den veks som ugras. Det er altså betre å plante den i ein avskjerma hage om du ikkje vil spre jordskokk over heile nabolaget), men resten skal fortærast til middag. Første knollane hamna i gryta allereie på tysdag då det var skrint i kjøleskapet etter ei veke borte. Med pappa sin torskefilet frå frysen, jordskokk blanda med potet i ein purè, ein litt småtrist broccoli og siste stump av pestopølsa til den lokale spekeprodusenten Lundal, vart det reine festmiddagen. -Og definitivt den mest kortreiste så langt i 2015!

Eg tok utgangspunkt i ei oppskrift frå Trines matblogg som eg har brukt gjentatte gonger. Ofte med litt ulike ingredienser, men målet er alltid den same smakskombinasjonen: salt kjøt, mild torsk, og smøraktig stappe av noko slag. Om ein i tillegg har noko søtt, er det toppen av kransekaka. Eg har prøvd ut varianten med granateple, men om ein ikkje har det, kan ein nytte fantasien. -Som til dømes betar av eple, pære eller kanskje til og med jordbær! Denne gongen hadde eg ingen av delene, men toppa heller med litt chiliolivenolje.

Kortreist og godt som berre det!

/Inga

DSC_0134

Quinoabetar med eple og sjokolade

DSC_0039 5Barseltid har ikkje vore gullperioden innan matlaging. Hadde det stått på meg, kunne me meir enn gjerne hatt brødskiver med makrell i tomat til middag kvar dag den første månaden (eg driv periodevis tungt (mis)bruk av makrell i tomat). Heldigvis kjem ein inn i ein viss tralt igjen etterkvart og eg har no byrja å lengte etter matlaginga att. Godt er jammen meg det.

Då er det fint at det er så mange inspirerande sjeler der ute. -Som Trine, som skriv Oliven&Sjokolade! Ho møtte eg under opninga av D/S Louise i juni. Ho er ei skikkeleg bra dame som skriv ein kjempefin blogg! Eg anbefalar på det sterkaste å ta turen innom.

Denne gongen var det quinoa-betane hennar som freista. Etter ein tur utandørs i iskaldt regn og sludd, freista det med noko søtt og varmande då eg kom inn igjen. Quinoa brukar eg gjerne til middagar, så dette kan vere ei fin resteoppskrift om ein har litt til overs ein dag.

DSC_0050 3Eg tilpassa oppskrifta eige kjøkenskap og måtte erstatte litt av havregryna (hadde berre pittelitt igjen) med mandelmjøl og lønnesirup med agavesirup. Istadenfor lakrispulver, tilsette eg 50 g grovhakka, mørk sjokolade. Lakris er forsåvidt ein god nr.2, så det må definitivt prøvast ut ein gong det også.

Då eg mangla muffinsformer i papir, klipte eg opp små kvadrat av bakepapir som eg hadde i formene. Eg hadde også litt meir røre i muffinsformene for å lage større betar.

Det smakte ganske enkelt himmelsk! Eplet gjorde betane litt friske, medan mandelmjølet gav ein liten smak av marsipan. I tillegg er dei fiberrike då dei inneheld mykje quinoa. Det er rett og slett eit nyttig mellommåltid og eg elska det.

Det kan vere verdt å merke seg at betane ikkje har same konsistens som muffins. Dei er langt meir porøse og er difor best å ete med skei. Saman med eit glas iskald mjølk og litt avislesing, vart det ein real søndagshøgdare.

/Inga

Sjokoladeskåler på 1-2-3

2013-12-31 03.29.25

Me var invitert bort på nyttårsafta men middagen skulle vere eit realt spleiselag. Då nyttårsafta like mykje er eit tidspunkt for å kike tilbake på året ein har lagt bak seg, var det ekstra stas å ta med smakar frå haustinga i år. Kjøtet fekk difor selskap av sylta gresskar og plommechutney, laga av mor mi no i haust. Det er luksus å ha slikt ståande på glas! Vertskapet er blitt habile ølbryggarar og baud mellom anna på årets julebrygg. Slik fekk me nytt dei siste smakane av 2013 før me gjekk inn i 2014.

2013-12-31 02.24.26   2013-12-31 03.25.07

For å kunne bidra litt til desserten, heiv eg meg rundt og laga ei sjokoladeskål til kvar gjest. Det ser veldig flott ut, -men er latterleg enkelt å lage. Slike løysingar er gull verdt å ha på baklomma om ein har litt dårleg tid.

Eg fekk tak i nokre ballongar og raida kjøkenskapa for sjokoladerestar etter jula. Til 8 ballongar, nytta eg rundt 300g sjokolade. Sjokoladen som er igjen i skåla etter dypping, kan ein koke kakao på, -så får ein nytta rubbel og bit!

Blås opp antal ballongar du treng (1 per skål), men gjerne nokre ekstra i tilfelle nokre skåler går i stykker undervegs. Smelt sjokoladen i vassbad og dypp ballongane før du set dei på ei fjøl/fat dekka med matpapir. Ballongane står av seg sjølve, då sjokoladen stivner fort og stabiliserer. Sett det kjølig og la sjokoladen stivne heilt.

2013-12-31 04.12.16 Når sjokoladen er stivna finn du fram ei nål og sprekk ballongane. Trekk forsiktig ballongen ut av skåla. Den kan av og til klistre seg litt fast, men med litt tolmod går dette heilt fint.

Litt av kanten på skålene kan av og til knekke av når ein fjernar ballongen, men det gjer ingenting. Det ser berre fint og  litt kunstnerisk ut med den ujamne kanten!

2013-12-31 03.24.45  2013-12-31 04.12.39

Det kan vere lurt å stå ein kjølig stad når du skal trekke ut ballongane for å unngå at sjokoladen vert mjuk. Med plussgradene me hadde på Vestlandet, stod eg utandørs ved ei gamal bakstefjøl og laga skålene. Elles vart dei avkjølt og oppbevart i kjøleskap.

2013-12-31 04.26.45Skålene vart brukt til å servere kuler med heimelaga lønnesirup-is på nyttårsafta. Det har eg diverre ikkje bilete av, men det var fint som berre det! …og lønnesirup-isen. Den tenkjer eg på enda, Solveig!

/Inga