Sitruslengsel

DSC_0218Eg har nemnt tidlegare at eg har ein forkjærleik for sitrus. Her ein dag tok lengselen overhand og eg måtte til naboen for å låne egg, slik at eg kunne lage sitronsabayonne til laksen. Storhandelen var nett overstått men egga hadde gått i gløymeboka. Godt ein har kjekke naboar to meter frå utgongsdøra!

Sitronsabayonne er sitronsaus som passar like godt til fisk som til kjøt. Den er syrleg, frisk og ein real oppkvikkar no på våren.

Sitronsabayonne (4 porsjonar)*

  • 2 eggeplommer
  • 1ts Dijon-sennep
  • saft og skal frå ei sitron
  • 1 ss tørka persille**
  • 100 g smør
  • 2 ts sukker***
  • 0,5-1 dl olivenolje

Pisk opp eggeplommene, persille, sennep, sukker og sitronsaft over eit vannbad, til du har eggedosiskonsistens. Smelt smøret til det byrjar å bruse i panna. Ta panna vekk i frå plata og la det kjølne i 5 minutt. Vend smøret inn i eggedosisen saman med olivenolje. Smak til med salt og pepper.

Server med til dømes asparges og steikt lakseloin!

* Sabayonne er ein eggedosiliknande fransk saus, som hovudsakleg inneheld egg, sukker, kvitvin og som ein bruker til dessertar. Dette er ein middagsvariant, -framleis med eggedosiskonsistens men med litt utbyting av ingredienser.
** eg brukte persille denne gongen, men estragon er også godt.
*** agavesirup eller sukrin kan også fungere fint om ein ikkje vil nytte vanleg sukker. Litt sødme må likevel til då sitronsafta fører til særs mykje syre. 2 ts sukker kan somme gonger vere for lite, så her må ein smake seg fram.

DSC_0234 3

Eg har tidlegare lagt ut ei oppskrift på klementinsaus som eg nytta til and. Appelsinsaft kan ein også nytte i desse sausane, for ikkje å snakke om lime! Dette har eg ikkje prøvd før, men står høgt på lista. Dersom ein nyttar appelsin eller klementin, treng ein ikkje sukker i sausen, men det må til når ein nyttar sitron og lime.

/Inga

Raudbetpesto

DSC_0031 7

Eg er over gjennomsnittet glad i raudbetar. På leverposteiskiva, i smoothies, i salat og til og med i bakst. Laurdag gjorde eg ein liten raudbetvri på helgepizzaen.

I tillegg til vanleg pizza margherita med tomatsaus, laga me nokre med raudbetpesto. Saman med litt spinat, salt geitost og valnøtter vart det veldig godt. Raudbetpestoen smakar søtleg men har likevel litt spark grunna kvitlauken og basilikumen.

Då det var meir igjen etter pizzaproduksjonen, vart resten oppete på rista brød under søndagsfrukosten. Nydeleg!

DSC_0038 9

Raudbetpesto

  • 2 medium raudbetar
  • ei handfull basilikum
  • ei handfull valnøtter
  • ei handfull grovreven parmesan
  • 2 kvitlauksfedd
  • salt og pepar
  • olivenolje

Skrell raudbetane og kok dei til dei er møre. I mellomtida rister ein valnøttene i ei varm steikepanne. Når det byrjar å lukte nøtteaktig set ein steikepanna til sides. Når raudbetane er ferdige, køyrer ein alle ingrediensene i ein kjøkenmaskin eller med stavmiksar. Hell i litt og litt olivenolje til pestoen har ynskja konsistens. Smak til med salt og pepar.

Server på godt brød eller pizza.

/Inga

Kokkelering med klementin #4

DSC_0125 2

Denne sausen passar fint til fugl og svin. Kanskje har du framleis ei juleribbe liggande i fryseboksen? Eg prøvde den saman med andebryst og det var utruleg godt. Saman med woka grønsaker, blomkålpuré, nokre rista mandelflak og litt timian, vart det fest!

Klementinsaus (2 porsjonar)

  • 2 dl klementinsaft
  • 2 ts reve klementinskal
  • 2 ts tørka eller frisk timian
  • 2 ss smør

Kok inn klementinsaft, klementinskal og litt av timianen til det er omtrent 3 ss igjen i kjelen. Bland inn steikesjy frå kjøtet og resten av timianen. Rør inn smøret like før du skal servere maten, men ikkje la sausen koke på nytt. Nyt!

20121212-200156.jpg 20121212-200355.jpg 20121212-200210.jpg

/Inga

Heimelaga pastasaus

I somar handla eg tomater hjå eit lokalt gardsutsal og laga tomatsaus av det heile. Det vart utruleg godt og ikkje minst praktisk då det vart heimelaga (og sunnare) ferdigmat som ein kunne fryse ned til seinare. Pakkane med saus forsvann fort til pastarettar og pizza-laging. No må eg snart lage ny ladning. Gardsutsalet er stengt for vinteren, men tomater er det heldigvis heile året i butikken.

Heile poenget med denne oppskrifta er å omnsbake tomatene, slik at smaken vert meir konsentrert. Resultatet er himmelsk.

Ingredienser

  • tomater (eg anar ikkje kor mykje eg brukte her, men det er rundt ein kilo. Bruk gjerne ulike typar tomater.)
  • 10 fedd kvitlauk
  • 1 raudlauk
  • 1 neve basilikum
  • olivenolje
  • salt og pepar

Del dei store tomatene i to og fjern det harde som høyrer til stilken. Skjer dei i skiver og fordel utover eit steikebrett dekka med bakepapir. Slik kjem ein unna mykje reingjering. Cherrytomatene deler ein berre i to. Fordel utover steikebrettet og pass på at tomatene ikkje dekkar kvarandre.

Fordel grovhakka basilikum og lauk over tomatene. Reins fedda og legg dei på toppen. Dryss over flaksalt og nykverna pepar. Avslutt med å helle over litt olivenolje.

Steik på 230 grader i rundt 25 minutt med over- og undervarme. Her må ein passe på litt sjølv, då steiketida kan variere frå omn til omn. Ta ut steikebrettet når tomatene er blitt gyldenbrune i skalet.

La tomatene kjølne før du moser alt i ein kjøkenmaskin eller med stavmiksar. Pass på å få med alt søet på steikebrettet.

Dersom du har like liten frysar som meg, er det fint å fryse ned porsjonar i Ziploc-posar. Dei kan frysast liggande og ein sparer dermed mykje plass. I tillegg tar det langt kortare tid å tine sausen. Eg brukar 1 liters-posar som er nok til ein middag for to. Ut av denne porsjonen brukte eg tre posar.

       

NB! Dersom ein skal nytte denne sausen til pasta, er det enda betre med ein skvett matfløyte oppi. Server saman med fullkornspasta og litt frisk basilikum på toppen.

/Inga